عبر الطفل جابر وشقيقه مؤمن عن سعادتهما بعد الجولة الإنسانية التي قاما بها مع صاحب صفحة “إيجيبت كده كده”، والتي حققت تفاعلًا كبيرًا على منصات التواصل الاجتماعي.
تعليق أسرة الطفلين جابر ومؤمن بعد الجولة الإنسانية
قال جابر: “جاب لنا ألعاب وشباشب وودانا نحلق، وجاب لي سكوتر وهدوم حلوة، أنا قاعد مع بابا.. ومامتي متوفية واللي بتراعيني مرات أخويا”
من جانبها، أوضحت زوجة شقيق الطفل أنها لا ترغب في أي مساعدة من دار رعاية، مشيرة إلى أنها تفضل بقاء الأطفال معها، حيث أكدت: “أنا مش طالبة حاجة من حد، عرضوا علينا دار رعاية لكن قولت لأ مش هخليهم يبعدوا عني، إحنا كل اللي عايزينه يطلع لهم شهادة ميلاد وأبوهم عايش”
وأضافت: “محتاجين نطلع لهم شهادات ميلاد ضروري.. واحنا عايشين مستورين لكن نفسنا في سكن لأننا بننام في الشارع، وجابر ومؤمن وأرزاق شقيقتهم يروحوا مدرسة ويتعلموا”
وأشارت إلى أنها تتصرف في مقام الأم بالنسبة لهم، قائلة: “نفسي يتعلموا وأفرح بيهم ونفسي يبقوا مرتاحين.. أنا مش عايزاهم يبعدوا عني، دول زي عيالي، واحنا مش بنستغل الناس واللي عايزه ربنا يكون”
كما أعرب صاحب الصفحة عن دعمه للأطفال، وردت الأسرة بقولها: “ربنا يسترها عليك ويساعدك زي ما بتساعد الناس ويستر طريقك، ووعدنا إنه هيجي تاني”
تجدر الإشارة إلى أن الجولة الإنسانية التي تضمنت شراء ألعاب وملابس وتجربة حلاقة للأطفال لاقت تفاعلًا واسعًا بين متابعي صفحة “إيجيبت كده كده”، حيث أكد الكثيرون على أهمية مثل هذه المبادرات في إدخال البهجة على قلوب الأطفال المحتاجين.
