التخطي إلى المحتوى

كتب- Yousry :

هكلمكم انهارده عن موضوع جديد اول مره اتكلم عنه واهميتها فى العربيه
هنتكلم انهارده عن محطة الفيوزات
عارف انت كده لما تدخل شقتك بيبقى فى جمب الباب لوحة توزيع كهرباء فيهاةشوية مفاتيح اتوماتكيه متوزعه ع الاحمال الكهربيه اللى فى الشقه عشان لو حصل قفله المفتاح ينزل ويقطع الكهرباء عن المكان اللى فيه الشورت او القفله
طب مش العربيات بردوا فيها احمال وكهرباء وكده يبقى لازم يكون ليها لوحة توزيع ومن هنا هوبا جات فكرة محطة الفيوزات
المحطه دى ياعمنا عباره عن صندوق راكب فيه مجموعه من الفيوزات والريلايهات المختلفه لتشغيل عدد معين من الوظائف فى العربيه
مش فاهم ؟!!
ابسطهالك
دلوقتى انت كل وظيفه عندك فى العربيه ليها دايره كهربيه زى مثلا النور الصغير والنور العالى والواطى والمساحات و……الخ
كل دايره من دول لازم يكون ليها فيوز يركب عشان يحميها عشان لو حصل فيها قفله الفيوز يتحرق ويحافظلك ع الدايره
فى دواير تانيه بتطلب ريلاى للتقوية زى مثلا طلمبة البنزين والنور العالى ووحدة الكمبيوتر واحيانا المارش
وكذا وظيفة تانيه
كل دا بيبقى متجمع وملموم عندك داخل محطة الفيوزات دى وبيتوزع فيها بالترتيب وبيدخلها كابل كهرباء محترم من البطاريه وهى بتوزع الكهرباء ع الاحمال وبيجلها ضفيره فيها الاشارات والاوامر ويخرج منها ضفيره تانيه لتشغيل الوظائف
المحطه او العلبه دى فيها منها نوعين
نوع رئيسى ( عمومى )
نوع فرعى
الرئيسى بيبقى راكب عندك فى حوض الموتور ودىى الاساسي بيبقى فيها الفيوزات الاساسيه بتاعة التغذيه ومسئوله عن تغذية وتشغيل معظم الوظائف الحيوية فى العربيه
النوع الفرعى ودا هتلاقى بيبقى دا خل الكابينة نفسها فى شمال الدركسيون كده او تحت رجلك مباشرة
ودا بيبقى فيه فيوزات خاصه بتشغيل الحاجات اللى جو الكابينه زى الكاسيت والولاعه ونور العدادات والانتظار و….الخ
فى عربيات بتكتفى بمحطه واحده بكل حاجه واحيانا يحطوها جوا او فى حوض العربيه
طب دلوقتى فى وظيفه مثلا عطلت عندك تعمل ايه ؟!
اول حاجه تفتح محطة الفيوزات وتكشف الغطاء بتاعها هتلاقى رسمه توضيحيه ع الغطاء ومخطط للفيوزات اللى قدامك بيوضح كل فيوز بتاع ايه وبيعمل ايه
هتلاقى الفيوز اللى اتت بتدور عليه اتحرق مثلا فهتغيره وتلاقى الوظيفه اشتغلت 😉
لازم تغير فيوز بنفس قيمة الفيوز اللى مسجل ف الكتالوج متجبش قيمه اعلى عشان لو حصلت قفله الفيوز هيحافظ ع نفسه والسلك هيتحرق واستنى بقى لما الفيوز يتحرق

التعليقات