التخطي إلى المحتوى
تعرف على أنواع الزيوت المناسبه لمحرك سياراتك

السوق فيه أنواع زيوت كتير قوي فيه اللي بيقولك ده 5000 كم، واللي يقوللك 10000 كم، واللي يقولك 25000 كم، وإحنا كدة كدة بنغيره على 3000 كم !! ده غير إن كل واحد بسعر، وفيه اللي يقولك خد الزيت ده أنا مجربه والتاني يقولك على نفس الزيت كلام تاني يحيرك ! إيه اللخبطة دي ؟

وده بيحصل لأن معظمنا مش عارف الفرق ما بين الزيوت ف إحنا بنعتمد على عمال تغيير الزيوت والمعلومات من الميكانيكية في موضوع تغيير الزيت ده وبصراحة مش كل اللي بيقولوه مظبوط لأنه مش مبني على معلومات ليها أساس علمي ومن وجهة نظري الشخصية إن أهم قاعدة في إختيار الزيت هو إنك ترجع لكتالوج عربيتك وتشوف إيه الزيت المناسب اللي يتحط في العربية .. طب أنا مش معايا كتالوج لعربيتي أعمل إيه عشان أعرف الزيت الكويس ؟!

ببساطة كدة فيه قواعد عالمية وأرقام مكتوبة على علبة الزيت ودي اللي منها بنقدر نعرف الزيت ده مناسب للعربية دي ولا لأ !! ومعلومة ليكوا أي زيت عربيات في العالم بيتعرف من حاجتين لزوجته ومستوي خدمته يعني إيه ؟!

أولاّ اللزوجة ودي بتتعرف من رقم الـ SAE اللي بيبقي علي علبة الزيت وبتبقي عبارة عن رقم الرقم ده كل ما زاد يبقي الزيت ده لزوجته بتزيد وكل ما الرقم ده قل كل ما الزيت ده لزوجته قلت زي كدة :- الرقم الصغير يعني زيت خفيف (0، 5، 10، 15، 20) أما الرقم العالي يعني زيت تقيل (30، 35، 40، 45، 50) بس الأهم من كدة بقي إن معظم الزيوت اللي بنستخدمها في معظم عربياتنا بتبقي زيوت متعددة درجات اللزوجة يعني زيت بيديك أداء وكأن فيه خليط زيوت خفيفة وتقيلة طب ليه كدة ؟!

الغرض من الزيت متعدد اللزوجة إنك لما تيجي تشغل عربيتك وهي باردة الزيت بيبقى ليه لزوجة معينة بتخليه يوصل لكل جزء في الموتور ويزيته بدرجة مناسبة ولما الموتور يسخن الطبيعي إن الزيت بيبدأ يخف مع إرتفاع درجة الحرارة بس ده هيخلي لزوجة الزيت ضعيفة، فا البوليمرز اللي بيبقي مضاف للزيت بيخلي الزيت محتفظ بنفس درجة اللزوجة حتي وهو سخن عشاااااان كدة بقي هنلاقي علي معظم علب الزيوت الشكل ده 20W-50 أو ده 5W-30 أو ده 15W-40 كلهم واحد علي فكرة مع إختلاف الأرقام الرقمين دول هما درجتين اللزوجة للزيت اللي بيبقي معاك في الوضع البارد وفي الوضع السخن يعني 20W-50 معناها إن الزيت ده في الحالة الخفيفة اللي هي والموتور سخن درجة لزوجته 20 والزيت ده في الحالة التقيلة اللي هي والموتور بارد لسة درجة لزوجته 50 وهكذا بقي ..

طب إزاي نعرف إن الزيت ده لزوجته تنفع للموتور ؟!
شوفوا هو الجو هنا في مصر درجة الحرارة فيه عالية نسبياّ وفي الشتا صعب توصل لتحت الصفر فا إحنا لو مشينا مع الكتالوجات زي ما مكتوب في معظم كتالوجات العربيات إن الزيوت اللي غالباّ بتشتغل في مصر من غير مشاكل هي الزيوت دي :-
20W-50
20W-40
15W-40
20W-40
15W-50

طب ما دام كل الزيوت دي ممكن تشتغل هل فيه فرق في كفاءة التشغيل ؟!
يعني مش أوي وده لان ميزة الزيت الـ 15w-50 عن الزيت الـ 15w-30 مثلاّ إن الزيت الأتقل اللي هو الـ 50 هيديك حماية أكبر لأجزاء الموتور وبالتالي الموتور عمره هيبقى أطول إنما الزيت الأخف اللي هو الـ 30 هيديك توفير أعلى في البنزين أما بقي بالنسبة لموضوع مستوي الخدمة هتلاقوه علي علبة الزيت مرموز ليه برمز API يعني الزيت ده المفروض إنه يشتغل قد إيه وهي دي بقي اللي بنقول عليها الـ 3000 والـ 5000 كيلو وبيتعمل على كل علبة زيت رمزين رمز (S) ده بيبقي للمواتير البنزين ورمز (C) ده بيبقي للمواتير الديزل (السولار) يعني فا مثلاّ :- زيت مكتوب عليه API SJ/CF
يعني إيه الكلام ده ؟! يعني الزيت ده مستواه (J) لمواتير البنزين ومستواه (F) لمواتير الديزل طب ده كويس ولا وحش ولا إيه ؟! كل ما كان الحرف اللي مكتوب متأخر في الأبجدية الإنجليزية كل ما كان الزيت ده أحسن يعني (G) أحسن من (F) و(M) أحسن من (L) ومن الأخر أحسن زيت حالياّ مستواه (N) لمواتير البنزين و(J) لمواتير الديزل

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status
free stats