التخطي إلى المحتوى
يعني أيه Pokemon Go ؟ كل اللى محتاج تعرفه عن لعبة ” بوكيمون جو ” أزاي تلاقي البوكيمون ؟

الكام يوم اللى فاتوا وبالتزامن مع العيد تقريبا، شركة Niantic نزلت نسخة تجريبيه من لعبتها المنتظرة Pokemon Go وهوب دبل كيك العالم اتجنن وكل الناس ماشية عينها فى موبايلاتها وأخبار عن حوادث طرق بسبب المهاويس اللى ماشيين يجمعوا بوكيمونات فى الشارع.

لو أنت زينا من المهاويس اللى اتربوا على تجميع البوكيمون وهم صغيرين وعايز تحقق حلم طفولتك وتـCatch ’em all تعالى نقولك تعمل ايه.

إزاى تنزل اللعبة؟

1

اللعبة لسه ما نزلتش رسمى. موجودة بس فى أمريكا وأستراليا ونيوزيلندا. لكن علشان تنزلها من أى مكان فى العالم اتبع الخطوات دي:

أندرويد:

الموضوع هـ يبقى أبسط، كل اللى محتاج تعمله تفتح اللينك ده  من موبايلك وتعمل داونلود للعبة.

ملحوظة: اللعبة محتاجة أندرويد كيت كات ٤.٤ على الأقل. لو موبايلك أقل من كده للأسف مش هـ تقدر تنزلها.

آيفون:

الموضوع أصعب شوية. هـ تحتاج تعمل أكاونت Apple ID جديد وتختار البلد أمريكا أو أستراليا، علشان تعمل ده امشى على الخطوات دى:

١- افتح الـAppstore وانزل تحت ودوس على تاب Featured.

٢- سكرول لتحت خالص هـ تلاقى الـApple ID بتاعك. دوس عليه واختار Sign out.

٣- بعدها روح على الـSettings واختار General> Language and Region وغير المكان لأمريكا أو أستراليا.

٤- دلوقتى روح على الـAppstore ودور على Pokemon Go هـ تلاقيها عادى، لو ما لقيتهاش ما تقلقش، جرب تنزل أى برنامج مجانى، ولما يطلب منك تعمل Log in اختار Create new Apple ID واعمل اكاونت جديد.

٥- امشى معاه على الخطوات بس اتأكد فى الـBilling تحط none وتحط عنوان فى أمريكا أو أستراليا حسب اللى أنت اخترته.

٦- علشان تحط عنوان مظبوط ويتقبل ممكن تجيب عنوان أى مكان فى أمريكا، مثلا فيه حد ريح دماغه وحط بيانات بيتزا هت:

Address: 1475 Country Club Dr، Madera، CA 93638، United States

Phone:+1 559-675-1000

٧- بعدها نزل اللعبة عادى واستمتع. ولما تخلص عيد أول خطوتين عادى واخرج وادخل بأكاونتك القديم.

إزاى تلعب Pokemon Go ؟

اللعبة بـ تعتمد على الحركة والتنقل. لما تفتح اللعبة هـ تلاقى قدامك خريطة أنت ماشى عليها متاخده من خرايط جوجل ومتركب عليها عالم اللعبة. عن طريق الـGPS اللعبة بـ تحدد مكانك وأنت بـ تتحرك وبـ تقابل بوكيمونات فى السكة وبـ تبدأ عملية جمعها.

فى البداية خالص هـ تلاقى حواليك ٣ بوكيمونات تختار واحد منهم تبدأ بيه هم ٣ مشهورين : سكويرتل، تشارمندر وبلباصور. هـ تدوس على واحد منهم علشان تبدأ جمع أول بوكيمون ليك.

هـ تلاقى الكاميرا بتاعتك اشتغلت وبقيت شايف البوكيمون قدامك فى الكاميرا وهـ يكون معاك كورة بوكيمون. هدفك دلوقتى ترميها على البوكيمون كويس علشان تصطاده.

خدعة: أول ما تبدأ ويطلعلك الـ٣، سيبهم وامشى، وبعد ما تبعد ويختفوا ارجع تانى (امشى وارجع دى حقيقية، محتاج تتحرك بعيد عنهم علشان الـGPS يلقطك)، كرر العملية دى ٤ مرات. فى المرة الخامسة هـ يطلعلك معاهم بيكاتشو!

الـPokestops ؟

بعد ما مسكت أول واحد، هـ تبدأ المغامرة الحقيقية، طول ما أنت ماشى على الخريطة هـ تلاقى أماكن شكلها كده:

وبتكون عادة معالم مشهورة زى مسجد مثلا أو منطقة سياحية أو مبنى مشهور. دى اسمها Pokestops. لما بتقف جوا النطاق بتاعها (اللى هو يكون المبنى جوا الدايرة اللى بتطلع منك دى). هـ تلاقى شكلها اتغير، دوس عليها هـ تفتح لك المكان، حرك صباعك على الشاشة بسرعة ولف القرص اللى قدامك هـ يطلعلك شوية items دوس عليهم علشان تاخدهم ليك. الحاجات دى كلها هـ تساعدك فى اللعبة، لو عايز تعرف كل item عبارة عن إيه وفايدته واستخدامه روح على اللينك ده.

بس أهم حاجات تعرفها هم:

Pokeballs: ودول كور البوكيمون اللى بـ تقفش بيها البوكيمونات.

Eggs: البيض ده بـ تدخله حضانة Incubator (من الـitems دوس عليه وهـ تعرف إزاى) وبـ يفقس بوكيمون بعد ما تمشى عدد كيلوهات معين.

ملحوظة: للأسف لازم تبقى فاتح اللعبة طول مدة المشى، والبرنامج بيعد بسرعة معينة فلو حاولت تفتحه وتخلص الـ٥ كيلو بالعربية مثلا مش هـ يحسبها، لازم تمشى.

Incense: وده مفيد فشخ، لما بـ تستخدمه بـ يقعد لمدة ٣٠ دقيقة يخلى البوكيمونات تيجى لحد عندك، مفيد جدا لو قاعد فى مكان لفترة ومش هـ تقدر تتحرك وعايز تلعب.

خدعة: الـPokestops بتعمل ريفريش كل ٥ دقايق، فأنت لو رحت لواحد وخدت الحاجة اللى فيه، لو استنيت ٥ دقايق ممكن تاخد تانى.

إزاى تلاقى بوكيمونات وأحسن طريقة تمسكهم بيها؟

طول ما أنت ماشى على الخريطة كل فترة هـ تقابل بوكيمونات، علشان تعرف إيه اللى حواليك تحت على اليمين هـ تلاقى قايمة اسمها Nearby. لما تدوس عليها هـ يوريك البوكيمونات القريبة منك.

تحت كل بوكيمون (بـ يبقى مش معرفك مين بس موريك شكله وهـ تعرفهم مع الوقت) هـ تلاقى علامة بصمة رجلين. دى بـ تعرفك قرب أو بعد البوكيمون عنك. لو واحده يبقى هو فى دايرة قطرها ١٠٠ متر حواليك. لو ٢ يبقى ٢٠٠ لو ٣ يبقى ٣٠٠. مش بـ يقولك فين بالظبط لازم تتحرك وتدور.

لكن لو مفيش تحته علامة يبقى هو جنبك دلوقتى. لو دست عليه هـ يظهر علطول وتبدأ عملية مسكه.

2

علشان تمسكه لازم تاخد بالك إنك مخليه فى نص الكاميرا بالظبط، ومحتاج تظبط قوة حدفتك وإتجاهها. الأفضل دائما تنشن على دماغه.

هـ تلاقى كمان حلقة حجمها بـ يتغير، أفضل حاجه تستنى لما تبقى فى أصغر حجم، ده أحسن وقت تحدف فيه. لون الحلقة بـ يحدد صعوبة مسك البوكيمون، كل ما الليفيل بتاعك بـ يعلى بتبقى أصعب. الأخضر أسهل حاجه وبعديها الأصفر والأحمر.

البوكيمون ممكن يهرب منك أو بعد ما تسمكه يخرج من الكورة وتحاول تانى، فيه أنواع من الكور أقوى من أنواع وفيه حاجات ممكن تأكلها للبوكيمونات الصعبة علشان تبقى أسهل بس هـ تتعلمها قدام مع الوقت.

خدعة: لف صباعك على الكورة علشان تلفها جامد واحدفها مقوسة ده بـ يديك بونص زيادة، بس محتاج تتمرن على الرمية دى.

إزاى تحارب وإيه هو الـGym؟

3

احنا أصلا داخلين الليلة دى علشان نحارب بالبوكيمونات اللى جمعناها مش كده؟. علشان تعمل ده أولا لازم توصل لليفيل ٥ الأول ساعتها تبقى مؤهل للدخول فى معارك.

علشان تخش معركة لازم تروح جيم بوكيمونات، ده هـ تلاقيه على الخريطة برضه شكله كده:

Gymfar

لما تدخل الجيم لأول مرة هـ يعرض عليك الدخول فى team من ٣، أحمر وأزرق وأصفر. مازال مفيش معلومات عن هل فيه فروق حقيقية ولا لأ بس لو ليك صحاب بـ يلعبوا ادخلوا سوا تيم واحد ألطف (أنا التيم الأزرق Mystic).

الجيم هـ تلاقيه متلون يا إما رمادى، يا إما لون من الـ٣ فرق. لو رمادى يبقى ده فاضى ممكن أنت تسيطر عليه وتبقى الريس بتاعه.

والمفترض أن هدف اللعبة أن التيم بتاعك يكسب ويسيطر على أكبر عدد من الجيمات وكده.

لو الجيم كان تبع تيم مختلف عن بتاعك تقدر تبدأ تخش معارك مع البوكيمونات اللى بـ تحمى الجيم، أنت ونصيبك فى عددهم بـ يبدأ من واحد لحد ١٠ حسب كام واحد حط بوكيمونات، ولازم تكسبهم كلهم علشان تخلى الجيم لون فريقك. وبالمناسبة أحيانا وأنت داخل هـ تلاقى الجيم منور وحواليه برق ورعد معناها أن فيه حد جوا بـ يحارب، ممكن تدخل معاه وتهزموا الجيم سوا.

لو الجيم تبع فريقك تقدر تديهم بوكيمون من عندك يشتغل على حماية الجيم، البوكيمون بـ يرجع مجموعتك بس لما يتهزم فنقى كويس.

بالنسبة لطريقة المعركة نفسها بـ يبقى البوكيمونين قصاد بعض وعندك ٣ حركات تعملها:

Fast attack: ودى بـ تضرب ضربة البوكيمون العادية جدا ودى بتعملها عن طريق إنك تدوس على الخصم مش أكتر، Just tap

Special attack: ودى الضربة المميزة لكل بوكيمون، علشان تقدر تعملها بتستخدم الـFast attack وكل ما تضرب تحت الـhealth bar بتاعك هـ تلاقى بار تانى بـ يملى، أول ما يملى أنت جاهز دوس على البوكيمون بتاعك أنت وعلق صباعك شوية وسيب هـ يعملها

Dodge: ودى اللى هى إنك تتفادى ضربة الخصم، حرك صباعك يمين وشمال علشان تتفادى الضربة.

إزاى تمرن البوكيمون بتاعك وتطوره؟

77

فيه حاجتين تقدر أساسيين هم اللى بـ تحاول تزودهم فى بوكيمونك:

CP: اللى هى Combat power، ودى قوته الهجومية وكل ما كانت أعلى من خصمك كانت فرصتك أفضل فى الفوز فى المعارك

HP: ودى الـHealth power اللى هى قدرته على تحمل الضربات وكده.

وعلشان تطور أى حاجه بـ تحتاج Stardust ودى بتاخدها لما بتمسك بوكيمون جديد أو بتروح Pokestop أو تكسب معركة وكده، وفيه حاجه تانية اسمها Pokemon Candy ودى بـ تبقى لكل نوع بوكيمون لوحده عكس الـStardust اللى ممكن تستخدمها مع أى بوكيمون.

تقدر تعمل حاجتين علشان تزود بوكيمونك:

Powerup: ودى بتحتاج stardust كتير وPokemon candy واحدة بس.

Evolve: ودى أنك تطور البوكيمون للمرحلة اللى بعد كده ودى بـ تحتاج Pokemon candy بس وده أصعب طبعا.

والاتنين بـ يزودوا الـCP والـHP.

والحاجة التانية اللى ممكن تعملها علشان تمرن البوكيمون إنك تدخل جيم من بتوع التيم بتاعك وتخش فى معارك تمرين معاهم ده بـ يزود خبرة بوكيمونك وقوته وضرباته.

خدعة: لما بـ تسيب بوكيمون يحمى جيم كل ٢٠ ساعة هيديك ٢٠ كوين بوكيمون تشترى بيهم حاجات من الـshop.

تعمل إيه بالبوكيمونات المتكررة؟

pokemon-go-transfer

أى بوكيمون متكرر عندك تقدر تعمل له Transfer، ودى حاجه بـ تخليك ترجع البوكيمون ده للعبة مقابل إنك تاخد شوية stardust وpokemon candy من نوع البوكيمون اللى رجعته هـ يساعدوك تطوره. بس خلى بالك وأنت بـ تختار أنهى واحد ترجعه، اختار الأقل CP.

علشان تعمل Transfer روح على قايمة البوكيمون ودوس على اللى أنت عايزه وسكرول لتحت خالص واختار Transfer.

إزاى تعالج بوكيمونك بعد المعركة؟

بعد المعارك الـHP بتاع بوكيمونك بـ يكون قليل جدا، ومحتاج تعمله Healing وترجعه تانى سليم، الوسيلة الوحيدة هى الـPotions والـrevival potions، تقدر تشتريها من الـshop لو معاك كوينات أو بـ تجيلك فى الـPokestops.

لو أنت خسرت المعركة بتحتاج تعمل Revive من قايمة Items. لكن لو كسبان وعايز بس تعوض الـdamage بتاع بوكيمونك هـ تختار Potion وتختار بوكيموناتك اللى محتاجة، كل واحد بيزود ٢٠ HP، هـ تحتاج كذا مرة علشان ترجعهم طبعا.

ودى شوية خدع وتريكات ونصايح مهمة لازم تعرفها:

– امسك كل اللى يقابلك كله مفيد.

– ما تستعجلش على التطوير، لأنك كل ما الليفيل بتاعك بـ يزيد ممكن تلاقى نفسك مسكت نفس البوكيمون تانى بـCP أعلى.

– تقدر تقفش حاجة الـPokestop وأنت سايق عادى بس امشى ببطء.

– كل ما الليفيل بتاعك بـ يزيد بـ تقابل بوكيمونات أقوى ونادرة أكتر.

– اللعبة لسه مش رسمى، فأحيانا هـ تلاقى السيرفر واقع أو بـ تهنج، اقفلها وافتحها تانى.

– تقدر من قايمة البوكيمون تغير اسمه

– فى http://www.ign.com/wikis/pokemon-go/Pokedex اللينك ده هـ تلاقى قايمة كل البوكيمونات وتطورها في اللعبة.

– تقدر تقفل الكاميرا وأنت بتصطاد البوكيمون عن طريق إنك تدوس AR. ده بـ يخلى العملية أسهل.

ودلوقتى، Catch ’em all !

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status