التخطي إلى المحتوى
الفرق بين محرك التيربو والمحرك العادي
كتير مننا بيسمع الفترة دي عن الموتور التربو وخصوصا إن معظم العربيات الحديثة دلوقتي نازلة بمواتير تربو ومن المعروف إن مواتير التربو بتبقي قوية وحاجات زي كدة .. طب ما تيجوا نشوف إيه حكاية المواتير دي وهل بتختلف إن يكون عندي موتور عادي وأركبله أنا بنفسي تربو وهل المواتير دي ليها أضرار علي المدي البعيد ونظام صيانتها بيبقي إزاي ؟ وعلي فكرة الموضوع جميل وهيزود من معلوماتكم أوي

في الأول كدة هو إيه الفرق بين مواتير التربو والمواتير العادية ؟ الموتور التربو يا جماعة ما يفرقش كتير عن الموتور العادي أو ميفرقش خالص أصلاّ إنما هو كل الموضوع إنه موتور متركب فوق منه تربو بس كدة ..

طب التربو ده بيعمل إيه ؟! وبيشتغل إزاي ؟
التربو زي ما معظمنا عارف إنه عبارة عن مروحة قوية جداّ مهمتها إنها تزود كمية الهوا اللي بتدخل في السيلندر عشان قوة الحرق تزيد بس إزاي !! هو إحنا مش لو زودنا الهوا الحرق ممكن يقل ؟! لأ أستنوا كل ما كان الهوا أكتر بنقدر ناخد حرق أفضل للبنزين عارفين بظبط الموضوع عامل زي إيه ؟! الموضوع عامل زي الفرق بين الفحم لما تولعه ولما الهوا بيجي عليه تلاقيه بيولع جامد وناره تزيد أوي وعشان نفهم أكتر خلينا نشوف الأول هو الموتور العادي الهوا بيدخله إزاي ؟

فيه حاجة في أي موتور أسمها الـ Intake Manifold أو مانيفولد السحب وده اللي بياخد الهوا من الفلتر ويوزعه على السلندرات طب هو بيسحب الهوا إزاي ؟ متهيألي إننا كدة محتاجين برضو ناخد فكرة سريعة عن دورة الإحتراق .. من ضمن أشواط الحريق اللي بتحصل في الموتور شوط أسمه شوط السحب وده بيحصل لما السيلندر بينزل لتحت ويسحب معاه الهوا عارفين زي بظبط نفس فكرة السرنجة لما بتشفط الدوا وفيه برضو شوط كمان وهو الأخير أسمه شوط العادم وده بيحصل لما السيلندر بيطلع لفوق ويطرد العادم من فتحة تانية اللي هي بتودي على الشكمان طب كدة بقي إيه هي حكاية التربو ؟ زي ما قولنا التربو هو عبارة عن مروحة بس الفكرة العبقرية هنا بقى إني أستخدم العادم في تشغيل المروحة دي .. إزاي ؟! التربو عبارة عن مروحة مزدوجة على عمود واحد .. واحدة متوصلة على العادم والتانية متوصلة على هوا السحب ولما حضرتك بتدوس بنزين العادم بيطلع بكمية كبيرة ويبدأ إنه يحرك المروحة اللي هي كمان بدورها بتحرك المروحة التانية اللي على بوابة السحب وتدخل هوا زيادة أو بمعنى أصح “تضغط الهوا”..

التربو عشان يشتغل كويس لازم الهوا اللي داخل في السحب يكون بارد نسبياّ، إنما اللي بيحصل عكس كدة لأن الهوا بيبقى سخن جداّ ويمكن يوصل لحد درجة حرارة 150 درجة مئوية بسبب حاجتين :-
1- ضغط الهوا بيرفع درجة حرارة الهوا جداّ.
2- لما الموتور بيسخن العادم السخن بيسخن التربو جداذ لدرجة إن التربو بيحمر من شدة السخونة.

والهوا لما يسخن بيبقى متمدد جداّ زي ما معظمنا عارف بمعني إن كمية الأكسجين اللي هتحرق البنزين هتبقى قليلة، وكدة يبقى التربو مالوش لازمة لأن الهوا اللي داخل مفيش فيه أكسجين !! طب إيه الحل عشان نبرد التربو ؟! الحل في تركيب سربنتينة يدخل فيها هوا السحب ويبرد فيها قبل ما يدخل السيلندر .. السربنتينة دي بيسموها “مبادل حراري” أو الـ Intercooler عشان كده هنلاقي العربيات اللي فيها تربو بيكون فيها فتحة في الكابوت عشان المبادل الحراري يبرد ..

طبعاّ الفتحات دي ممكن أي حد يعملها في العربية حتى لو مجرد منظر مش بجد طب إزاي أعرف إن الموتور ده فيه تربو بجد ؟! الموتور التربو هتلاقيله صفارة مميزة بتزيد مع زيادة عدد لفات الموتور وغالباّ هتلاقيها متأخرة سنه صغيرة عن الموتور وده اللي بيسموه تأخير التربو أو الـ Turbo Lag ..

أخر حاجة زي ما قولنا فوق إن الهوا الأكتر معناه حرق أفضل وأسرع ومعناه برضو إستهلاك بنزين أعلى لو عملنا مقارنة مع موتورعادي بنفس السعة اللترية بس حقيقي الميزة الأساسية من التربو هي إننا نقدر ناخد قدرة أعلى من مواتير أصغر أو نقدر نعمل تعديل على الموتور الأصلي وناخد منه قدرة أعلى، وبكفاءة إستهلاك وقود أفضل بدون شك عشان كدة في الحالة دي لما نيجي نقارن هنقارن الموتور أبو 1600 سي سي وفيه تربو مع موتور عادي 2700 سي سي لأنهم بيطلعوا تقريباّ نفس القدرة الحصانية، وساعتها هتلاقي موتور الـ 1600 سي سي مع تربو بيستهلك بنزين أقل من موتور الـ 2700 سي سي من غير تربو.

الفرق بين محرك التيربو والمحرك العادي

الفرق بين محرك التيربو والمحرك العادي

الفرق بين محرك التيربو والمحرك العادي

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status