التخطي إلى المحتوى
يعنى ايه Short Block معلومات عن Short Block

الشـورت بـلوك  Short Block
اية الشورت بلوك دة ؟
ناس قالتلك دة نص المكنة اللى تـحت و بيبقى منـغير وش سلندر و باقى اجهزة التغدية ذى الطلمبات و الدينامو و المارش و بيكون فية الكرنك و البساتم و الشمايز وناس تانيه قالتلك الشورت هو موتور بالوش من غير ادوات التغذية
مش هتفرق يعنى
انت فى الاخر عارف انت عايز تجيب نص موتور ولا موتور كامل من غير ادوات التغذية
سـعر الشورت للـعربيات الـ 4 سـلندر سـعـرة بيـعمل منـ 2000 الى 4000 حـسب نـوع العـربية
و العـربيات الغالية و العالية بيبقى أغلى فى الـسعر
طـب اية السبب اللى يـخلينى أشترى شورت بـلوك
1 – انك تـيجى تـعمل عمرة تـلاقى التـكلفة بتاعت العمرة اعلى و اغلى من تمن الشورت و انك متاكد ان وش السلندر عـندك تـمام
2 – انك مش عاوز تشترى موتور كامل فـ بتشترى شورت
لو لاقدر الله احتجت تجيب شورت بلوك جديد او هتغير عموما لاى سبب من الاسباب
حط فى اعتبارك ان الشورت بلوك دة بيبقى له ورق بيجى معها بيبقى عبارة عن افراج جمركى من التاجر والشورت بيبقى عليه الرقم الموجود فى الرخصه واسمه رقم الموتور وفى ناس بتجيب الشورت دا من غير ورق وبيبقى سعرة قليل وتقوم تاخد الحشو بتاعو وتركبه فى موتور العربية
المثبوت فى الرخصة ودايما مصنعية نص الشورت بتبقى اعلى من تركيب شورت موتور لان الميكانيكى بيبنى الموتور من تانى ويقسمه والاحسن انك تجيب موتور بالوش بتاعه من غير الملحقات لانك لو هتجيب نص شورت ممكن يكون عندك وش السلندر تعبان فالاحسن انك تجيب موتور كامل فاضى
3 -تكلفة تركيب الشورت او النص شورت بتبقى اقل من تكلفة العمرة
الـناس بـقى اللى بتجيب نص الشورت و بتركبة علطول و لو فى مشكلة ترجع تكتشف بعدين بعد ما تكون دورت الموتور ان نص الـشورت بلوك مستخدم قـبل كدة و مستعمل و طالع عـينة بس متلمع و متنضف و طبـعا الكلام دة للـناس اللى بـتشترى أستيراد فا الـحل بتاع الكلام دا بطبقه فى المركز عندنا بحيث لما بنجيب نص شورت ( بلوك بالباساتم) وشكله مش عاجبنا وقلقانين منه بنـفك البـساتم نطمن و نكشف عليها لو تمـام الشورت بيركب عادى غير كدة الشروت بيتغير
وهغششكوا شوية حاجات كده وشوية حتت صياعه مبتجيش غير من وهبه هتعجبكوا
عشان تشترى شورت ويطلع سليم من اول مرة
وانت رايح تشترى خد الميكانيكى بتاعك معاك يبص عليه
يفضل لو الشورت اللى هتجيبه فى حساسات يبقى تكون معظمها سليم عشان تعرف تحتفظ بطقم حساسات ببلاش تشيلة عندك كانه قطع غيار
ويا سلام بقى لو الشورت جاى وراكب على الحساسات بتاعته فيش مقطوعه هتبقى كده معاك شوية فيش حلوين تشيلهم للزمن بدل ماتبوظ فيشة معفنة متسواش ٢ جنيه وتروح لكهربائى يحسبهالك ب٥٠ جنية
لما تروح تجيب الشورت حاول على قد ما تقدر يكون الوشوش الفبر بتاعة الكاتينة والموتور سلام
لو لاقيت الكارتيرا بتاعت الزيت مغبطه ومتنيه اعرف ان التاجر دا مهمل وبيرزع المواتير فى الارض
بص على الفرن او خرج الشكمان لو لاقيت تعريق زيت فى مكانه اخلع من الشورت دا لانه كده بيدخن
بلاش تنقى شورت يكون غرقان زيت لان دا معناه ان الموتور بينفخ وعايز شمبر
ارفع مقاس الزيت والقى نظرة كده على الزيت لو لاقيته فيه رايش معدنى اخلع من الشورت دا ولو حتى ببلاش
الحته اللى جاية دى بقا صياعه نمره واحد
بص على بوز كوع المياه الالومنيوم الحته اللى بيركب عليها الكوع الكاوتش لو لاقيته بيلمع اعرف ان الموتور دا حلو وجديد لو لاقيته يعنى نص مصدى دا طبيعى والموتور كويس ودا بسبب الاملاح اللى فى المياه
لاقيته متاكل ودايب اعرف ان الموتور مستهلك وصاحب العربية اللى كان فيها الموتور دا حريقة وكان مستهلك العربيه على الاخر
النصيحه دى انا بطبقها معرفش غيرى بيعملها ولا لا ؟!
بعد ما ربنا يكرمنا وندور الشورت ويبقى تمام بعديها بالف كيلو بنعمله طقم سيرفيس عشان نطول عمره

 

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status