التخطي إلى المحتوى
السيارات المستعملة وإزاي تختار لنفسك او لصاحبك العربية الصح

في البداية كدة لازم تعرف إن العربيات سوقها كبير وكبير أوي كمان وممكن بكل سهولة يضحك عليك وتلاقي نفسك دفعت اللي وراك واللي قدامك في عربية أنت مش عايزها وغالباّ بعد سنة أو أتنين هتبيعها وده بيبقي بسبب إنك متعرفش حاجة عن العربية اللي أنت رايح تشتريها يعني أنت مجرد واحد معاك فلوس وعايز عربية طب تعالي الأول نقسم

سوق العربيات في مصر ماشي إزاي :-
في مصر أنواع العربيات كتير جداّ يعني مثلاّ فيه عندك العربيات الألماني وأكتر حاجة بتتميز بيها العربيات الألماني هي القوة وفيه عندك العربيات الياباني وأكتر حاجة بتتميز بيها العربيات الياباني هي الرفاهية وفيه عندك العربيات الكوري وفيه عندك العربيات الأمريكي !! مش بقولك سوق العربيات كبير ..

 

طيب خلينا في المهم موضوع أختيار العربية دايماّ ده بياخد مجهود وتفكير كتير ولأن إحنا في مصر والعربية سلعة غالية جداّ مقارنة بمستوى الدخل فا معظمنا بيعتبر إن تمن العربية هو الحاجة الأساسية اللي بيقارن بيها بين عربية والتانية أو بمعنى تاني معظمنا بيشوف العربيات اللي في نفس الفئة السعرية وبعدين بيبدأ يقارن .. بس أنت لو فعلاّ عايز تختار عربية صح يبقي السعر مش هو أول حاجة تختار بيها لأنك لازم قبل ما تشتري تاخد من وقتك شوية وفكر في أول حاجة وشوف أنت إيه !! يعني إيه أنت إيه ؟

 

يعني هل أنت راجل ولا ست لأن الراجل بيبقي عايز عربية قوية وملامحها حادة زي العربيات الألماني اللي أتكلمنا عنها فوق إنما الست بتبقي عايزة عربية شكلها رقيق زي العربيات الكوري وهل أنت شاب صغير ولا معاك عيله لأن الشاب الصغير بيبقي عايز عربية صغيرة وسريعة ومتستهلكش بنزين إنما رب الأسرة بيبقي عايز عربية تكفي العيله كلها .. تاني حاجة لازم تحدد أنت عايز إيه من العربية أو بمعنى أصح أنت أغلب مشاويرك بتبقي فين هل جوة البلد في الزحمة ولا بتسافر علي طول وهل مشاويرك قصيرة ولا طويلة هل عايز عربية سريعة ولا عايز عربية موفرة في البنزين هل عايز عربية تستحمل المرمطة ولا عايز عربية الناس تشاور عليك ..

 

بعد السؤالين دول دي هتلاقي نفسك أستبعدت عربيات كتير من دماغك وهتفكر بقي هتشتري عربية سيدان يعني بـ 4 باب وليها شنطة من ورا زي أي عربية في الشارع ولا هتشتري عربية هاتشباك بـ 4 باب برضو بس من غير شنطة ورا ولا هتشتري عربية 4×4 زي الجيب وهكذا وعشان كمان بعد كدة هتحدد بقي إيه هي الكماليات اللي أنت عايزها في العربية زي مثلاّ التكييف – الباور – الفتيس الأوتوماتيك – الإزاز الكهربا الـ GPS وهكذا بقي .. أما أخر حاجة هتفكر فيها هي الفلوس وطبعاّ دي خطوة مهمة جداّ لأنك غالباّ لو معاك تمن العربية اللي في دماغك مش هيبقى عندك أزمة وهتشتري بكل بساطة إنما المشكلة بقى إنك تبقى عارف أنت عايز إيه ومش عارف تجيبه عشان الفلوس مش مساعداك وهنا بقي هتبقي مضطر إنك تتنازل شوية عن الكماليات اللي بتبقي في العربية بحيث تقلل من سعر العربية شوية .. وأوعي تنسي الصيانة يعني هل التوكيل محترم وقطع الغيار متوفرة ولا هتجيب عربية وتقعد تعيط جنبها لما يحصلها حاجة !!

 

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status