التخطي إلى المحتوى
‏استلام العربية الجديدة‬ لو قررت أهو خلاص إنك تشتري عربية جديدة وأنت لسة في المعرض

لما بنيجي نستلم العربية طبعاّ الواحد بيبقي مش عارف يعمل إيه نظراّ لأنه معندوش خبرة وبيبقي قلقان لا يدبس في عربية مشكوك فيها مشيها عشان كدة تعالوا نتعرف علي أهم الحاجات اللي لازم تعملوها قبل ما تستلموا مفتاح العربية :-

– وقت الإستلام دايماّ حاول علي أد ما تقدر تستلم العربية بالنهار وخاصةّ والشمس طالعة أوي يعني من وقت الظهر للعصر عشان أي حاجة في العربية تشوفها كويس.

– من برة خدلك لفة حوالين العربية وبص إذا كان فيها أي خبطة أو خدوش أو مرشوشة أو فيه فروق لون ولو الإستيكر الأبيض ده موجود شيله في ساعتها عشان لو فيه حاجة مستخبية كدة ولا كدة لأن أحياناّ كتير بيبقي تحت اللزق ده فروق لون والزبون للأسف بيتدبس.

– بص تحت العربية كويس عشان ميكونش فيه حاجة ملحومة في العربية من تحت أو صدأ وأتأكد إن الأبواب لما بتتقفل بتبقي مظبوطة ومفيش فيها فروق.

طيب كله تمام التمام ومفيش خبطات ولا خدوش ولا حتة رشة ولا فروق في الصاج والإكصدامات مفيش حاجة ومربوطة كويس ولا لحام ولا صدأ والكاوتش كله جديد بشوكه ولقيت إن وقفة العربية بشكل عام من بعيد ولا معووجة ولا تحس إنها عرجة يبقي كدة البداية مبشرة.
– من جوة أمسك الأبواب كلها باب باب وتشوف الفرش أو الفيبر يعني متقفل مش مكسور ولا مشروخ و لا حتة مفكوكة والإزاز سليم بيطلع وبينزل بدون مشاكل ولا بتسمع صوت تزييق والأكرة شغالة كويس ولو الإزاز كهربا يبقي الزراير شغالة كويس بدون ما تعلق طالع نازل أكتر من مرة ورا بعض والمسوجر بيقفل ويفتح بدون مشاكل والأكرة برة وجوة تمام والسنترلوك إن وجد والكاوتش اللي حوالين القايم والباب تمام مش مقطوع ولا فيه أي مشاكل.
– أمسك الكراسي و الكنب وتقعد علي الكرسي وتشوف بيطلع لقدام وورا والضهر بيرجع لورا وقدام لو فيه خاصية يطلع وينزل والفرش والكراسي تمام مفيهومش أي قطع وتشوف الكنبة سليمة مش ملخلخة ولا فيها أي قطع ولو الكنبة من اللي ضهرها بيتقفل ويتفتح تشوفها بتتقفل وتتفتح تمام بدون مشاكل.
– أمسك أرضية العربية اللي هو الفرش اللي في الأرض شوفه كله ميكونش فيه أي قطع وسليم من أول الطابلوه لحد الكنبة ومتقفل تمام التمام وفرش السقف متقفل ومفيهوش أي قطع ولو فيه فتحة سقف بتقفل وتفتح عادي بدون مشاكل وتشوف أحزمة الأمان كلها لما تشدها بترجع تاني و لا بتعلق والمكان اللي بيدخل فيه الحزام سليم ولا بيعلق لما تيجي تفتح الحزام و لو الحزام ليه لمبة في التابلوه تشوفها إذا كانت شغالة ولا لأ ؟!.
– نيجي بقي للطابلوه نفتح الأنوار كلها ونشوفها شغالة ولا لأ اللي هي عند العداد واللي تحت الزراير والفوانيس ورا وقدام والعالي والواطي والإشارات ورا وقدام وجنب لو موجود
واللمبة بتاعت المارشدير بتنور ولا لأ والفوجات إن وجدت ولمبة الصالون شغالة ولا لأ وبتشتغل مع الابواب و لا لأ ولمبة الهاند وجرب المساحات قدام و ورا إن وجد وبعدين تجرب التكييف علي الدرجات المختلفة وتشوف الهوايات كلها شغالة ولا لأ والكاسيت تجرب كل زرايره وفتحاته والسماعات والصوت ويفضل يكون معاك شريط كاسيت أو سي دي علي حسب عشان تجربه ويا سلام لو إم بي ثري لو الكاسيت فيه فتحة وتشوف الراديو والإريال ميكونش مكسور ومحطوط منظر والصوت تمام وشوف الولاعة شغالة ولا لأ والطفاية موجودة ولا لأ وتشوف درج الطابلوه بيفتح كويس ومش مشروخ و لا فيه مشكلة والشماسات والمرايات بتفتح وتقفل بدون مشاكل وأخيراّ جرب كل الزراير الموجودة الخاصة بأي كماليات تانية إن وجدت زي المرايات والباركينج سينسور والإنذار والسنترلوك.

– الشنطة تشوفها بتتفح وبتتقفل تمام ولا فيه مشاكل والمفتاح شغال ولا لأ وتبص في الشنطة وتشيل الفرش اللي موجود وتبص مفيش صدأ والإستبن موجود والكوريك والمثلث وشنطة الإسعافات والرف اللي بيتحط عليه السماعات سليم ولا مكسور ولمبة الشنطة إن وجدت.

– الحوض بتاع الموتور بقي “الكابوت” تفتحه من جوة وتشوف بيفتح عادي و لا لأ وبيتقفل كويس و لا فيه مشكلة وتبص علي الحوض وإن ميكونش فيه صدأ وكل حاجة أنضف من الصيني بعد غسيله ومفيش أي حاجة مفكوكة وكله سليم وكله لسه بشوكه وتراجع علي السوائل كلها زي زيت الموتور تكشف عليه وزيت الفرامل ومية المساحات والردياتير.

نيجي بقي للأهم من كل ده .. الحاجات دي مهمة جداّ جداّ جداّ ولو ملقتهاش لازم تسأل عنها وتبهدل الدنيا :-

– كتالوج العربية ودفتر الصيانة والضمان.
– المفاتيح المفروض مفتاحين وأنا عمري ما سمعت عن وجود أكتر من كده بس جايز مع العلم إن طبعاّ فيه عربيات من غير مفاتيح.
– الريموت أياّ كان إنذار أو سنتر.
– الولاعة وطفاية السجاير.
– الإستبن والكوريك وعصايته ومفتاح الصليبة.
– علبة العدة.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status