التخطي إلى المحتوى
بعض ‫النصائح‬ المهمة جدا فى قيادة السياره قبل السفر

1- ماتسندش إيديك على عصاية الفتيس المانيوال طول ما أنت سايق عشان ده بيتلف غوايش الفتيس وهتلاقى الغيار بينطر (بيمور لوحده) وأنت ماشى وده هيكلفك فيما بعد طقم إصلاح وحوار كبير.

2- لما تركن العربية خلى العجل عدل يعنى يكون الدركسيون فى النص وتكون العربية على أرض مستويه قدر المستطاع بلاش يكون نصها فوق الرصيف ونصها تحته سواءّ نصها الأمامى والخلفى أو نصها اليمين والشمال

3- إملأ تانك البنزين بإستمرار ما تخليهوش يوصل لربع التانك لأن الفراغ اللى فى التانك بيتملى هوا مشبع ببخار الميا يعنى رطوبه وصدا فى مواسير ودورة البنزين + إن طلمبة البنزين الكهربا بتعتمد فى تبريدها على إنها تكون غاطسة فى البنزين + لما بتمشى على الجزء الأخير من التانك فا أنت كدة عمال بتسحب بنزين مليان رواسب إتراكمت فى قعر التانك وده بيسد دورة البنزين وفتحات الرشاشات وفلتر البنزين وكمان بياكل بنزين بسبب البخر.

4- ضغط الهوا المظبوط للكاوتشات مهم جداّ لسلامتك وبيحافظ على إستهلاك البنزين المثالى والحفاظ على الكاوتش والعفشة و قولنا كتير قدام 30 و ورا 33 صيف شتاء وراجع عليه مع كل تفويله أو كل أسبوعين بالكتير.

5- لما تركن العربية أعتمد على التثبيت بفرامل اليد مش بغيار الفتيس يعنى تخلى العربية ممورة وتشد فرامل اليد.

6- حاول فى منازل الكبارى أو أى منخفض فى الطريق وبصفة عامة تسيب العربية واخدة غيار وتهدى بالفرامل (بلاش تمور وتعتمد على الفرامل بس).

7- نظافة ومتابعة تغيير فلتر الهوا مهمة جداّ لإطالة عمر زيت الموتور ونظافته و لإطالة عمر الموتور بمنع الاتربه من الوصول للبساتم والتجريح فى جدرانها كمان بتفرق فى توفير إستهلاك البنزين جامد وتسهل السحب.

8- تبديل مواضع الكاوتشات بيطول العمر الإفتراضى للكاوتش وبيكون أفضل فى إتزان العربيه وبيكون كل 10000 كم.

9- متابعة الصيانات الدورية (تغيير زيوت وفلاتر وبوجيهات) فى مواعيدها يعتبر تجديد لشباب السيارة وإطاله لعمرها وتحسين لأدائها وإستهلاكها للبنزين عشان كدة بنعمل الصيانه كل 5000 كم.

10- تسخين العربية لمده 30 ثانية موضوع مهم جداّ عشان الموتور يكون إتشبع بالزيت فى كل أجزائه وياريت نتلافى التحرك بالعربية وفيه في الموتور أجزاء الزيت لسو موصلهش فا يبقى حديد بياكل فى حديد وطبعاّ المدة القليلة دى عشان عربيتنا إنجكشن ومعدل سريان الزيت الموصى به عالى فى بداية الدوارة عكس العربيات الكربارتير.

11- كل فترة ظبط رجلاش فرامل اليد لأن ده بيخفف الحمل على التيل الأمامى وبيطول عمره وتجنب الإستمرار فى الضغط على الدبرياج لفترة طويلة يعني مور الغيار لو الموضوع هيطول.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

DMCA.com Protection Status